karam kuchh is tarah se katib-e-taqdir karta hai

karam kuchh is tarah se kātib-e-taqdīr kartā hai

sazā dene meñ bandoñ ko sadā tāḳhīr kartā hai

ajab dīvāngī-e-shauq se tadbīr kartā hai

koī to hai musalsal jo mujhe ta.amīr kartā hai

pahuñchtī hai kahāñ āvāz un ūñche makānoñ meñ

koī mahrūmiyoñ ko nāla-e-shabgīr kartā hai

mujhe gumnām rahne hī nahīñ detā kisī sūrat

vo chārāgar mire zaḳhmoñ kī yuuñ tash.hīr kartā hai

amīr-e-vaqt kis manzil meñ pahuñchā hai junūñ terā

nidā-e-sub.h-e-nau ko halqa-e-zanjīr kartā hai

lagā do bandisheñ shahr-e-dil-ārā ke makīnoñ par

vahī bas ḳhvāb dekhe ḳhvāb jo ta.abīr kartā hai

ḳhabar bhī hai tujhe ai husn-e-be-parda sar-e-mahfil

tirī sūrat ko āñkhoñ meñ koī tasvīr kartā hai

ḳhatā kartā huuñ jaise maiñ koī lagtā hai yuuñ mujh ko

tujhe jab yaad rakhne meñ ye dil taqsīr kartā hai

suno ai hākim-e-daurāñ mo.arriḳh vaqt hai aisā

vo jo kuchh dekhtā hai bas vahī tahrīr kartā hai

diloñ par hukmrānī yūñhī 'ash.har' kī nahīñ qaa.em

mohabbat kī sabhī ke naam vo jāgīr kartā hai

karam kuchh is tarah se katib-e-taqdir karta hai

saza dene mein bandon ko sada taKHir karta hai

ajab diwangi-e-shauq se tadbir karta hai

koi to hai musalsal jo mujhe tamir karta hai

pahunchti hai kahan aawaz un unche makanon mein

koi mahrumiyon ko nala-e-shabgir karta hai

mujhe gumnam rahne hi nahin deta kisi surat

wo chaaragar mere zaKHmon ki yun tashhir karta hai

amir-e-waqt kis manzil mein pahuncha hai junun tera

nida-e-subh-e-nau ko halqa-e-zanjir karta hai

laga do bandishen shahr-e-dil-ara ke makinon par

wahi bas KHwab dekhe KHwab jo tabir karta hai

KHabar bhi hai tujhe ai husn-e-be-parda sar-e-mahfil

teri surat ko aankhon mein koi taswir karta hai

KHata karta hun jaise main koi lagta hai yun mujh ko

tujhe jab yaad rakhne mein ye dil taqsir karta hai

suno ai hakim-e-dauran moarriKH waqt hai aisa

wo jo kuchh dekhta hai bas wahi tahrir karta hai

dilon par hukmrani yunhi 'ashhar' ki nahin qaem

mohabbat ki sabhi ke nam wo jagir karta hai