karb ka samna khel to hai nahin kaunsa ishq is mein to sar jaenge

karb kā sāmnā khel to hai nahīñ kaunsā ishq is meñ to sar jā.eñge

aap ko achchhe se jāntā huuñ miyāñ aap to baat karne se Dar jā.eñge

yuuñ zabūñ-hāl dekhā to hamdardī meñ gardish-e-daurāñ bhī ham-safar ho ga.ī

log Darte haiñ aisī balā se bahut aur ham haiñ ise le ke ghar jā.eñge

aise behis bhī maujūd haiñ ai ḳhudā sar-ba-sar jin meñ unsur nahīñ ḳhauf kā

ham burā sochte haiñ kisī kā agar to yaqīñ maan kuchh der mar jā.eñge

kuchh marātib maqāmāt kī had se bhī tai kiye jaate haiñ do jahāñ meñ naqīb

ab agar dekh rūh-ul-amīñ jaate haiñ aage sidra se to un ke par jā.eñge

vahshateñ yuuñ muqaddar huī haiñ ki ham baa'd tere to shorīda-sar ho ga.e

kaam tartīb meñ kar nahīñ paate ab karnā kuchh chāheñ kuchh aur kar jā.eñge

ye zarūrī nahīñ de do ḳhairāt meñ naan nafqa kisī māñgne vaale ko

tajraba hai mirā ba.az kashkol to sun ke 'alvī' dilāse hī bhar jā.eñge

karb ka samna khel to hai nahin kaunsa ishq is mein to sar jaenge

aap ko achchhe se jaanta hun miyan aap to baat karne se Dar jaenge

yun zabun-haal dekha to hamdardi mein gardish-e-dauran bhi ham-safar ho gai

log Darte hain aisi bala se bahut aur hum hain ise le ke ghar jaenge

aise behis bhi maujud hain ai KHuda sar-ba-sar jin mein unsur nahin KHauf ka

hum bura sochte hain kisi ka agar to yaqin man kuchh der mar jaenge

kuchh maraatib maqamat ki had se bhi tai kiye jate hain do jahan mein naqib

ab agar dekh ruh-ul-amin jate hain aage sidra se to un ke par jaenge

wahshaten yun muqaddar hui hain ki hum ba'd tere to shorida-sar ho gae

kaam tartib mein kar nahin pate ab karna kuchh chahen kuchh aur kar jaenge

ye zaruri nahin de do KHairaat mein nan nafqa kisi mangne wale ko

tajraba hai mera baz kashkol to sun ke 'alwi' dilase hi bhar jaenge