karb ki lazzaton ko DhunDenge

karb kī lazzatoñ ko DhūñDeñge

ham na.e mah-vashoñ ko DhūñDeñge

jo tire pyaar kā badal na baneñ

phir unhī hasratoñ ko DhūñDeñge

nīm-jāñ log chiyuñTiyoñ kī tarah

rizq ke maḳhzanoñ ko DhūñDeñge

shahr vaale to kab ke so bhī ga.e

kis liye qahqahoñ ko DhūñDeñge

be-sukūñ shaḳhs khojiyoñ kī tarah

apne apne gharoñ ko DhūñDeñge

Tahniyāñ koñpaloñ ko tarseñgī

peḌ taaza rutoñ ko DhūñDeñge

raat ke vaqt kitne sard mizāj

jism kī hiddatoñ ko DhūñDeñge

ab 'niyāz' apnī zard āñkhoñ meñ

ham ga.ī raunaqoñ ko DhūñDeñge

karb ki lazzaton ko DhunDenge

hum nae mah-washon ko DhunDenge

jo tere pyar ka badal na banen

phir unhi hasraton ko DhunDenge

nim-jaan log chiyunTiyon ki tarah

rizq ke maKHzanon ko DhunDenge

shahr wale to kab ke so bhi gae

kis liye qahqahon ko DhunDenge

be-sukun shaKHs khojiyon ki tarah

apne apne gharon ko DhunDenge

Tahniyan konpalon ko tarsengi

peD taza ruton ko DhunDenge

raat ke waqt kitne sard mizaj

jism ki hiddaton ko DhunDenge

ab 'niyaz' apni zard aankhon mein

hum gai raunaqon ko DhunDenge