کرب میں ڈوبے ہوئے خوں ریز منظر رکھ دئیے

کرب میں ڈوبے ہوئے خوں ریز منظر رکھ دئیے

کس نے میری خشک آنکھوں میں سمندر رکھ دئیے

دیکھ کر شوق شہادت بر سر مقتل مرا

قاتلوں نے ہاتھ سے گھبرا کے خنجر رکھ دئیے

تیرگی فرقہ پرستی کی بڑھی تب ظلم نے

روشنی کے واسطے جلتے ہوئے گھر رکھ دئیے

چھوڑ کر سب کچھ چلا تھا جانب منزل جنوں

کیوں خرد نے راہ میں رشتوں کے پتھر رکھ دئیے

وہ بڑے معصوم لفظوں میں کیا کرتا تھا بات

کس نے اس کے رس بھرے لہجے میں نشتر رکھ دئیے

میں نے سوچا تھا مٹا دوں یاد ماضی کے نقوش

نیند نے آنکھوں میں پھر یادوں کے پیکر رکھ دئیے

لغزشوں میں یوں تو دونوں تھے برابر کے شریک

اس نے سب الزام لیکن میرے سر پر رکھ دئیے

میں نے بس اتنا کہا تھا آپ کیوں ناراض ہیں

اس نے میرے روبرو شکوؤں کے دفتر رکھ دئیے

مے کشی کے واسطے ببیاکؔ سوچا تک نہ تھا

اس نے میرے سامنے آنکھوں کے ساغر رکھ دئیے