karb main Dube hue KHun-rez manzar rakh diye

karb maiñ Duube hue ḳhūñ-rez manzar rakh diye

kis ne merī ḳhushk āñkhoñ meñ samundar rakh diye

dekh kar shauq-e-shahādat bar-sar-e-maqtal mirā

qātiloñ ne haath se ghabrā ke ḳhanjar rakh diye

tīrgī firqa-parastī kī baḌhī tab zulm ne

raushnī ke vāste jalte hue ghar rakh diye

chhoḌ kar sab kuchh chalā thā jānib-e-manzil junūñ

kyoñ ḳhirad ne raah meñ rishtoñ ke patthar rakh diye

vo baḌe ma.asūm lafzoñ meñ kiyā kartā thā baat

kis ne us ke ras-bhare lahje meñ nashtar rakh diye

maiñ ne sochā thā miTā duuñ yād-e-māzī ke nuqūsh

niiñd ne āñkhoñ meñ phir yādoñ ke paikar rakh diye

laġhzishoñ meñ yuuñ to donoñ the barābar ke sharīk

us ne sab ilzām lekin mere sar par rakh diye

maiñ ne bas itnā kahā thā aap kyoñ nārāz haiñ

us ne mere rū-ba-rū shikvoñ ke daftar rakh diye

mai-kashī ke vāste 'bebāk' sochā tak na thā

us ne mere sāmne āñkhoñ ke sāġhar rakh diye

karb main Dube hue KHun-rez manzar rakh diye

kis ne meri KHushk aankhon mein samundar rakh diye

dekh kar shauq-e-shahadat bar-sar-e-maqtal mera

qatilon ne hath se ghabra ke KHanjar rakh diye

tirgi firqa-parasti ki baDhi tab zulm ne

raushni ke waste jalte hue ghar rakh diye

chhoD kar sab kuchh chala tha jaanib-e-manzil junun

kyon KHirad ne rah mein rishton ke patthar rakh diye

wo baDe masum lafzon mein kiya karta tha baat

kis ne us ke ras-bhare lahje mein nashtar rakh diye

main ne socha tha miTa dun yaad-e-mazi ke nuqush

nind ne aankhon mein phir yaadon ke paikar rakh diye

laghzishon mein yun to donon the barabar ke sharik

us ne sab ilzam lekin mere sar par rakh diye

main ne bas itna kaha tha aap kyon naraaz hain

us ne mere ru-ba-ru shikwon ke daftar rakh diye

mai-kashi ke waste 'bebak' socha tak na tha

us ne mere samne aankhon ke saghar rakh diye