کریں گے ہم سے تقابل یہ کیا جہاں والے

کریں گے ہم سے تقابل یہ کیا جہاں والے

بہار والے کہاں اور کہاں خزاں والے

کیا تھا وقت شہادت جو آخری سجدہ

اسی زمیں پہ اترتے ہیں آسماں والے

نماز فجر پہ بیداری کا سبب ہے یہی

ہمارے سینوں میں رہتے ہیں وہ اذاں والے

وہ جس کے در پہ اترتے ہیں آسماں کے لوگ

دعائیں دیتے ہیں ہم کو وہی مکاں والے

اب اس مقام پہ اپنا قیام رہتا ہے

کہ ناز کرتے ہیں جس پر سبھی جناں والے

سنو کہ آج بھی مقتل سے آ رہی ہے صدا

بچا کے لے گئے انسانیت سناں والے

فلک پہ روندا تھا نعلین سے جنہیں اک روز

وہ ہم نے راستے دیکھے ہیں کہکشاں والے

وہ جن کے سینوں پہ ہیں نقش ماتمی سورج

اجالے بانٹ رہے ہیں وہی نشاں والے