karenge humse taqabul ye kya jahan wale

kareñge ham se taqābul ye kyā jahāñ vaale

bahār vaale kahāñ aur kahāñ ḳhizāñ vaale

kiyā thā vaqt-e-shahādat jo āḳhirī sajda

usī zamīñ pe utarte haiñ āsmāñ vaale

namāz-e-fajr pe bedārī kā sabab hai yahī

hamāre sīnoñ meñ rahte haiñ vo azaañ vaale

vo jis ke dar pe utarte haiñ āsmāñ ke log

duā.eñ dete haiñ ham ko vahī makāñ vaale

ab us maqām pe apnā qiyām rahtā hai

ki naaz karte haiñ jis par sabhī jināñ vaale

suno ki aaj bhī maqtal se aa rahī hai sadā

bachā ke le ga.e insāniyat sināñ vaale

falak pe rauñdā thā nālain se jinheñ ik roz

vo ham ne rāste dekhe haiñ kahkashāñ vaale

vo jin ke sīnoñ pe haiñ naqsh-e-mātamī sūraj

ujāle baañT rahe haiñ vahī nishāñ vaale

karenge hum se taqabul ye kya jahan wale

bahaar wale kahan aur kahan KHizan wale

kiya tha waqt-e-shahadat jo aaKHiri sajda

usi zamin pe utarte hain aasman wale

namaz-e-fajr pe bedari ka sabab hai yahi

hamare sinon mein rahte hain wo azan wale

wo jis ke dar pe utarte hain aasman ke log

duaen dete hain hum ko wahi makan wale

ab us maqam pe apna qiyam rahta hai

ki naz karte hain jis par sabhi jinan wale

suno ki aaj bhi maqtal se aa rahi hai sada

bacha ke le gae insaniyat sinan wale

falak pe raunda tha nalain se jinhen ek roz

wo hum ne raste dekhe hain kahkashan wale

wo jin ke sinon pe hain naqsh-e-matami suraj

ujale banT rahe hain wahi nishan wale