karenge zulm duniya par ye but aur aasman kab tak

kareñge zulm duniyā par ye but aur āsmāñ kab tak

rahegā piir ye kab tak rahoge tum javāñ kab tak

ḳhudāvandā inheñ kis din shu.ūr aa.egā duniyā kā

raheñgī be-paḌhī-likhī hamārī laḌkiyāñ kab tak

phiregā aur kitne din ḳhayālī paar ghoḌe par

uḌegā sher-goī meñ na engine kā dhuāñ kab tak

inān-e-hukmarānī dekhiye kis din ḳhudā legā

raheñge qismatoñ par hukmarāñ ye āsmāñ kab tak

diye jā.eñge kab tak shaiḳh-sāhib kufr ke fatve

raheñgī un ke sandūqcha meñ diiñ kī kunjiyāñ kab tak

chalī jā.egī ik hī ruḳh havā taaki zamāne kī

na puurā hogā terā daur ye ai āsmāñ kab tak

tahammul ḳhatm hote hī baḌī bad-nāmiyāñ hoñgī

tumhāre ḳhauf se 'parvīñ' na kholegī zabāñ kab tak

karenge zulm duniya par ye but aur aasman kab tak

rahega pir ye kab tak rahoge tum jawan kab tak

KHudawanda inhen kis din shuur aaega duniya ka

rahengi be-paDhi-likhi hamari laDkiyan kab tak

phirega aur kitne din KHayali par ghoDe par

uDega sher-goi mein na engine ka dhuan kab tak

inan-e-hukmarani dekhiye kis din KHuda lega

rahenge qismaton par hukmaran ye aasman kab tak

diye jaenge kab tak shaiKH-sahib kufr ke fatwe

rahengi un ke sanduqcha mein din ki kunjiyan kab tak

chali jaegi ek hi ruKH hawa taki zamane ki

na pura hoga tera daur ye ai aasman kab tak

tahammul KHatm hote hi baDi bad-namiyan hongi

tumhaare KHauf se 'parwin' na kholegi zaban kab tak