kari nigah-o-samaat ne bartari taslim

karī nigāh-o-samā.at ne bartarī taslīm

laboñ ke saath tirī baat bhī huī taslīm

ham aise log pas-e-jism saañs lete haiñ

hamārī maut bhī hotī hai zindagī taslīm

charāġh DhūñD ke laa.e koī to kah denā

hamārī aañkh añdhere ko kar chukī taslīm

tum ek bahr meñ joḌo duā ke saare hurūf

ki āsmān pe hotī hai shā.irī taslīm

atā kī qadr baḌhātī hai aur mahrūmī

so ek andhā bhī kartā hai raushnī taslīm

dayār-e-sher meñ parda bahut zarūrī hai

kahā sunā hai sabhī rad hai an-kahī taslīm

charāġh huuñ so mirā kaam sirf jalnā hai

koī kare na kare merī raushnī taslīm

abhī bhī koī ḳhalā hai 'aqīl' duniyā meñ

abhī bhī lagtā hai duniyā nahīñ huī taslīm

kari nigah-o-samaat ne bartari taslim

labon ke sath teri baat bhi hui taslim

hum aise log pas-e-jism sans lete hain

hamari maut bhi hoti hai zindagi taslim

charagh DhunD ke lae koi to kah dena

hamari aankh andhere ko kar chuki taslim

tum ek bahr mein joDo dua ke sare huruf

ki aasman pe hoti hai shairi taslim

ata ki qadr baDhati hai aur mahrumi

so ek andha bhi karta hai raushni taslim

dayar-e-sher mein parda bahut zaruri hai

kaha suna hai sabhi rad hai an-kahi taslim

charagh hun so mera kaam sirf jalna hai

koi kare na kare meri raushni taslim

abhi bhi koi KHala hai 'aqil' duniya mein

abhi bhi lagta hai duniya nahin hui taslim