karishma-saz-o-sarapa-bahaar hai ki nahin

karishma-sāz-o-sarāpā-bahār hai ki nahīñ

shabāb-o-husn-e-ġhazal bā-vaqār hai ki nahīñ

ḳhizāñ kā daur sahī ye batāo ahl-e-chaman

yaqīn-e-āmad-e-fasl-e-bahār hai ki nahīñ

bajā ki mai-kada vīrāñ hai masjideñ ābād

ra.īs-e-shahr bhī parhez-gār hai ki nahīñ

zabāñ ḳhatīb kī mazmūñ ra.īs-e-shahr kā hai

namāziyoñ pe ye raaz āshkār hai ki nahīñ

nigāh chāhiye tahlīl-o-tajziye ke liye

ḳhizāñ kā daur naved-e-bahār hai ki nahīñ

hamārā māzī-o-hāzir bhī ik muamma hai

bahār thī ki nahīñ thī bahār hai ki nahīñ

ġhazal to kahte haiñ sab ham magar ye dekhte haiñ

vo karb-e-asr kī ā.īna-dār hai ki nahīñ

hijāb māne-e-jalva sahī naved bhī hai

ḳhizāñ naqāb-e-nigār-e-bahār hai ki nahīñ

madār baḳhshish-o-pursish kā hai niyat pe 'na.īm'

umīd-e-rahmat-e-parvardigār hai ki nahīñ

karishma-saz-o-sarapa-bahaar hai ki nahin

shabab-o-husn-e-ghazal ba-waqar hai ki nahin

KHizan ka daur sahi ye batao ahl-e-chaman

yaqin-e-amad-e-fasl-e-bahaar hai ki nahin

baja ki mai-kada viran hai masjiden aabaad

rais-e-shahr bhi parhez-gar hai ki nahin

zaban KHatib ki mazmun rais-e-shahr ka hai

namaziyon pe ye raaz aashkar hai ki nahin

nigah chahiye tahlil-o-tajziye ke liye

KHizan ka daur nawed-e-bahaar hai ki nahin

hamara mazi-o-hazir bhi ek muamma hai

bahaar thi ki nahin thi bahaar hai ki nahin

ghazal to kahte hain sab hum magar ye dekhte hain

wo karb-e-asr ki aaina-dar hai ki nahin

hijab mane-e-jalwa sahi nawed bhi hai

KHizan naqab-e-nigar-e-bahaar hai ki nahin

madar baKHshish-o-pursish ka hai niyat pe 'naim'

umid-e-rahmat-e-parwardigar hai ki nahin