karishma-sazi-e-dil dekhta hun

karishma-sāzī-e-dil dekhtā huuñ

tumheñ apne muqābil dekhtā huuñ

jahāñ manzil kā imkāñ hī nahīñ hai

vahāñ āsār-e-manzil dekhtā huuñ

sadā dī tū ne kyā jaane kahāñ se

magar maiñ jānib-e-dil dekhtā huuñ

kahāñ kā rahnumā aur kaisī rāheñ

jidhar baḌhtā huuñ manzil dekhtā huuñ

ishārā hai tirā tūfāñ kī jānib

magar maiñ huuñ ki sāhil dekhtā huuñ

mohabbat hī mohabbat hai jahāñ par

mohabbat kī vo manzil dekhtā huuñ

mire hāthoñ meñ bhī hai saaz lekin

abhī maiñ rañg-e-mahfil dekhtā huuñ

tire hāthoñ se jo TuuTā thā ik din

vahī TuuTā huā dil dekhtā huuñ

kabhī tūfāñ hī tūfāñ hai nazar meñ

kabhī sāhil hī sāhil dekhtā huuñ

ġhurūr-e-husn-e-bātil par nazar hai

niyāz-e-ishq-e-kāmil dekhtā huuñ

'majāz' aur husn ke qadmoñ pe sajde

ma.āl-e-zo.am-e-bātil dekhtā huuñ

karishma-sazi-e-dil dekhta hun

tumhein apne muqabil dekhta hun

jahan manzil ka imkan hi nahin hai

wahan aasar-e-manzil dekhta hun

sada di tu ne kya jaane kahan se

magar main jaanib-e-dil dekhta hun

kahan ka rahnuma aur kaisi rahen

jidhar baDhta hun manzil dekhta hun

ishaara hai tera tufan ki jaanib

magar main hun ki sahil dekhta hun

mohabbat hi mohabbat hai jahan par

mohabbat ki wo manzil dekhta hun

mere hathon mein bhi hai saz lekin

abhi main rang-e-mahfil dekhta hun

tere hathon se jo TuTa tha ek din

wahi TuTa hua dil dekhta hun

kabhi tufan hi tufan hai nazar mein

kabhi sahil hi sahil dekhta hun

ghurur-e-husn-e-baatil par nazar hai

niyaz-e-ishq-e-kaamil dekhta hun

'majaz' aur husn ke qadmon pe sajde

maal-e-zoam-e-baatil dekhta hun