karne wale ne hi ki dekh inayat kaisi

karne vaale ne hī kī dekh ināyat kaisī

terā phir mujh se gila kaisā shikāyat kaisī

ab hameñ duur se pahchān liyā jaatā hai

ishq meñ ham bhī banā baiThe haiñ sūrat kaisī

kyoñ khaḌe muñh ko take jaate ho maiñ haarā huuñ

merā sar kaaT ke le jaao ijāzat kaisī

kitnī āsānī se maiñ khulne lagā huuñ sab par

ḳhud pareshāñ huuñ ki bigḌī hai ye aadat kaisī

āḳhirī vaqt meñ ye apnā patā detā hai

ishq hai ishq miyāñ is kī alāmat kaisī

to mohabbat meñ zarūrī thā hameñ har lamha

tujh se ab ishq hai so ishq meñ hājat kaisī

chain se jiine kahāñ dete tire baa'd hameñ

ham ne ḳhud hosh gañvā.e haiñ himāqat kaisī

roz-e-mahshar maiñ batā.ūñgā tū kyā pūchhegā

ek muhtāj pe guzrī hai qayāmat kaisī

karne wale ne hi ki dekh inayat kaisi

tera phir mujh se gila kaisa shikayat kaisi

ab hamein dur se pahchan liya jata hai

ishq mein hum bhi bana baiThe hain surat kaisi

kyon khaDe munh ko take jate ho main haara hun

mera sar kaT ke le jao ijazat kaisi

kitni aasani se main khulne laga hun sab par

KHud pareshan hun ki bigDi hai ye aadat kaisi

aaKHiri waqt mein ye apna pata deta hai

ishq hai ishq miyan is ki alamat kaisi

to mohabbat mein zaruri tha hamein har lamha

tujh se ab ishq hai so ishq mein hajat kaisi

chain se jine kahan dete tere ba'd hamein

hum ne KHud hosh ganwae hain himaqat kaisi

roz-e-mahshar main bataunga tu kya puchhega

ek muhtaj pe guzri hai qayamat kaisi