karo talash had-e-asman milne na mile

karo talāsh had-e-āsmāñ milne na mile

nishān-e-rahguzar-e-kārvāñ mile na mile

chalo jalā.e hue mash.al-e-yaqīñ dil meñ

kanār-e-bahr-e-muhīt-e-gumāñ mile na mile

ravāñ-davāñ huuñ har ik mauj-e-ḳhush-ḳhirām kī samt

pas-e-sarāb vo jū-e-ravāñ mile na mile

abhī sadā-e-jaras gūñjtī hai kānoñ meñ

surāġh-e-qāfila-e-raftgāñ mile na mile

abhī na dāman-e-ummīd chhūTne paa.e

phir ek baar vo nazdīk-e-jāñ mile na mile

har ek gaam hai ik sajda-gah 'tamannā.ī'

jabīñ ko sañg-e-dar-e-āstāñ mile na mile

karo talash had-e-asman milne na mile

nishan-e-rahguzar-e-karwan mile na mile

chalo jalae hue mashal-e-yaqin dil mein

kanar-e-bahr-e-muhit-e-guman mile na mile

rawan-dawan hun har ek mauj-e-KHush-KHiram ki samt

pas-e-sarab wo ju-e-rawan mile na mile

abhi sada-e-jaras gunjti hai kanon mein

suragh-e-qafila-e-raftgan mile na mile

abhi na daman-e-ummid chhuTne pae

phir ek bar wo nazdik-e-jaan mile na mile

har ek gam hai ek sajda-gah 'tamannai'

jabin ko sang-e-dar-e-astan mile na mile