کرتا نہ کبھی وا لب اظہار تمنا

کرتا نہ کبھی وا لب اظہار تمنا

ہوتا میں اگر واقف اسرار تمنا

اک جست میں تھی وسعت کونین کے اس پار

اللہ رے یہ گرمیٔ رفتار تمنا

ہر آن ہے اک نغمگیٔ شوق کی جھنکار

کیا زمزمہ پرواز ہے ہر تار تمنا

ناموس تمنا کا بھرم ہے تو اسی سے

کرتا ہی نہیں جو کبھی اظہار تمنا

آتی ہی نہیں راہ نظر اس سے مفر کی

ہر سمت ہے وہ حلقۂ دیوار تمنا

ہر شخص کو سودا ہے اسی جنس گراں کا

ہر شخص ہے دنیا میں پرستار تمنا

اک حشر سا برپا ہے مرے دل میں جلیسؔ آج

ٹوٹی ہے یقیناً کوئی دیوار تمنا