کرتا نہیں کوئی بھی سیاست مرا قلم

کرتا نہیں کوئی بھی سیاست مرا قلم

لکھتا ہے حرف حرف صداقت مرا قلم

ظالم اگرچہ ہوگا مرا بھی کوئی عزیز

اس سے بھی پھر کرے گا بغاوت مرا قلم

سن کر کہ اس کے بارے میں لکھنا ہے آج پھر

محسوس کر رہا ہے مسرت مرا قلم

تم یہ سمجھ رہے ہو بنائے گا صرف پھول

اگلے گا آگ وقت ضرورت مرا قلم

رسوا کہیں بھی ہونے نہیں دیتا ہے مجھے

کرتا ہے مجھ سے ایسی محبت مرا قلم

سودا جہاں پہ کرنا پڑے گا ضمیر کا

ٹھوکر پہ مار دے گا وہ دولت مرا قلم

اپنا ہو چاہے غیر ہو کوئی ہو سونیاؔ

دیتا نہیں کسی کو رعایت مرا قلم