karte hi nahin tark-e-butan taur-e-jafa ka

karte hī nahīñ tark-e-butāñ taur-e-jafā kā

shāyad hamīñ dikhlāveñge dīdār ḳhudā kā

hai abr kī chādar shafaqī josh se gul ke

maiḳhāne ke haañ dekhiye ye rañg havā kā

bahuterī giro jins-kulāloñ ke paḌī hai

kyā zikr hai vaa.iz ke musallā-o-ridā kā

mar jā.egā bātoñ meñ koī ġham-zada yuuñ hī

har lahza na ho mumtahin arbāb-e-vafā kā

tadbīr thī taskīñ ke liye logoñ kī varna

ma.alūm thā muddat se hameñ nafā davā kā

haath ā.īna-rūyoñ se uThā baiTheñ na kyūñkar

bil-aks asar paate the ham apnī duā kā

aañkh us kī nahīñ ā.īne ke sāmne hotī

hairat-zada huuñ yaar kī maiñ sharm-o-hayā kā

barsoñ se tū yuuñ hai ki ghaTā jab umañD aa.ī

tab dīda-e-tar se bhī huā ek jhaḌākā

aañkh us se nahīñ uThne kī sāhab nazroñ kī

jis ḳhaak pe hogā asar us kī kaf-e-pā kā

talvār ke saa.e hī meñ kaaTe hai to ai 'mīr'

kis dil-zada ko hue hai ye zauq fanā kā

karte hi nahin tark-e-butan taur-e-jafa ka

shayad hamin dikhlawenge didar KHuda ka

hai abr ki chadar shafaqi josh se gul ke

maiKHane ke han dekhiye ye rang hawa ka

bahuteri giro jins-kulalon ke paDi hai

kya zikr hai waiz ke musalla-o-rida ka

mar jaega baaton mein koi gham-zada yun hi

har lahza na ho mumtahin arbab-e-wafa ka

tadbir thi taskin ke liye logon ki warna

malum tha muddat se hamein nafa dawa ka

hath aaina-ruyon se uTha baiThen na kyunkar

bil-aks asar pate the hum apni dua ka

aankh us ki nahin aaine ke samne hoti

hairat-zada hun yar ki main sharm-o-haya ka

barson se tu yun hai ki ghaTa jab umanD aai

tab dida-e-tar se bhi hua ek jhaDaka

aankh us se nahin uThne ki sahab nazron ki

jis KHak pe hoga asar us ki kaf-e-pa ka

talwar ke sae hi mein kaTe hai to ai 'mir'

kis dil-zada ko hue hai ye zauq fana ka