karte rahe kar sakte the hum jitni bhi koshish

karte rahe kar sakte the ham jitnī bhī koshish

dīvār-e-ta.assub meñ kahāñ honī thī jumbish

zindāñ kī salāḳhoñ sī haiñ paanī kī ye tāreñ

sayyād se kuchh kam nahīñ har-vaqt kī bārish

lāzim nahīñ paidal chalūñ yā dauḌ lagā.ūñ

haiñ ghar ke mire kaam hī achchhī-bhalī varzish

maanā ki ilaaj is ke sivā kuchh nahīñ lekin

kyā dil ke badalne se badal jā.egī ḳhvāhish

kotāhiyāñ apnī to dikhā.ī nahīñ detīñ

har baat meñ aatī hai nazar ġhair kī sāzish

kuchh sañg-e-garāñ-māya hameñ bhī mile 'bāsir'

sach hai ki akārat nahīñ jaatī koī kāvish

karte rahe kar sakte the hum jitni bhi koshish

diwar-e-tassub mein kahan honi thi jumbish

zindan ki salaKHon si hain pani ki ye taren

sayyaad se kuchh kam nahin har-waqt ki barish

lazim nahin paidal chalun ya dauD lagaun

hain ghar ke mere kaam hi achchhi-bhali warzish

mana ki ilaj is ke siwa kuchh nahin lekin

kya dil ke badalne se badal jaegi KHwahish

kotahiyan apni to dikhai nahin detin

har baat mein aati hai nazar ghair ki sazish

kuchh sang-e-garan-maya hamein bhi mile 'basir'

sach hai ki akarat nahin jati koi kawish