کرتی ہی نہیں دل سے کبھی نقل مکانی

کرتی ہی نہیں دل سے کبھی نقل مکانی

چپکی ہے مری یاد سے تتلی سی کہانی

اک عہد محبت کی فضا جھانک رہی ہے

دیکھو تو ذرا غور سے تصویر پرانی

اک آس دریچے میں مرے خواب پڑے ہیں

کھلتی ہے جہاں رات گئے رات کی رانی

نکلی ہو جو تقلید محبت کے سفر پر

کیا یاد نہیں تم کو وہ دریا کی روانی

چپ چاپ کسی یاد میں کھوئی ہوئی آنکھیں

اور آنکھوں میں ٹھہرا ہوا بے تاب سا پانی

ہوتی ہوں صدفؔ جب بھی اداسی کی فضا میں

دھیرے سے تھپک دیتی ہے اک یاد سہانی