karti hi nahin dil se kabhi naql-e-makani

kartī hī nahīñ dil se kabhī naql-e-makānī

chipkī hai mirī yaad se titlī sī kahānī

ik ahd-e-mohabbat kī fazā jhāñk rahī hai

dekho to zarā ġhaur se tasvīr purānī

ik ās-darīche meñ mire ḳhvāb paḌe haiñ

khultī hai jahāñ raat ga.e raat kī raanī

niklī ho jo taqlīd-e-mohabbat ke safar par

kyā yaad nahīñ tum ko vo dariyā kī ravānī

chup-chāp kisī yaad meñ khoī huī āñkheñ

aur āñkhoñ meñ Thahrā huā be-tāb sā paanī

hotī huuñ 'sadaf' jab bhī udāsī kī fazā meñ

dhīre se thapak detī hai ik yaad suhānī

karti hi nahin dil se kabhi naql-e-makani

chipki hai meri yaad se titli si kahani

ek ahd-e-mohabbat ki faza jhank rahi hai

dekho to zara ghaur se taswir purani

ek aas-dariche mein mere KHwab paDe hain

khulti hai jahan raat gae raat ki rani

nikli ho jo taqlid-e-mohabbat ke safar par

kya yaad nahin tum ko wo dariya ki rawani

chup-chap kisi yaad mein khoi hui aankhen

aur aankhon mein Thahra hua be-tab sa pani

hoti hun 'sadaf' jab bhi udasi ki faza mein

dhire se thapak deti hai ek yaad suhani