kasak purane zamane ki sath laya hai

kasak purāne zamāne kī saath laayā hai

tirā ḳhayāl ki barsoñ ke baad aayā hai

kisī ne kyuuñ mire qadmoñ tale bichhāyā hai

vo rāsta ki kahīñ dhuup hai na saayā hai

Dagar Dagar vahī galiyāñ chalī haiñ saath mire

qadam qadam pe tirā shahr yaad aayā hai

batā rahī hai ye shiddat ujaaḌ mausam kī

shaguft-e-gul kā zamāna qarīb aayā hai

havā-e-shab se kaho aa.e phir bujhāne ko

charāġh ham ne sar-e-shām phir jalāyā hai

kaho ye Dūbte tāroñ se do ghaḌī ruk jaa.eñ

nishān-e-gum-shudagāñ muddatoñ meñ paayā hai

bas ab ye pyaas kā sahrā ubuur kar jaao

nadī ne phir tumheñ apnī taraf bulāyā hai

fusūn-e-ḳhvāb-e-tamāshā ki TūTtā jaa.e

maiñ so rahā thā ye kis ne mujhe jagāyā hai

sulag uThe haiñ sharāre badan meñ kyuuñ 'maḳhmūr'

ḳhunuk havā ne jo baḌh kar gale lagāyā hai

kasak purane zamane ki sath laya hai

tera KHayal ki barson ke baad aaya hai

kisi ne kyun mere qadmon tale bichhaya hai

wo rasta ki kahin dhup hai na saya hai

Dagar Dagar wahi galiyan chali hain sath mere

qadam qadam pe tera shahr yaad aaya hai

bata rahi hai ye shiddat ujaD mausam ki

shaguft-e-gul ka zamana qarib aaya hai

hawa-e-shab se kaho aae phir bujhane ko

charagh hum ne sar-e-sham phir jalaya hai

kaho ye Dubte taron se do ghaDi ruk jaen

nishan-e-gum-shudagan muddaton mein paya hai

bas ab ye pyas ka sahra ubur kar jao

nadi ne phir tumhein apni taraf bulaya hai

fusun-e-KHwab-e-tamasha ki TuTta jae

main so raha tha ye kis ne mujhe jagaya hai

sulag uThe hain sharare badan mein kyun 'maKHmur'

KHunuk hawa ne jo baDh kar gale lagaya hai