kasak thi dil mein abhi iztirab aisa tha

kasak thī dil meñ abhī iztirāb aisā thā

hamāre paas thā koī ki ḳhvāb aisā thā

mire junūñ ko fazīlat-ma.āb tum ne kiyā

jahān-e-ishq meñ kis kā ḳhitāb aisā thā

lagā ki aañkh hī pathrā ga.ī hai nargis kī

hamāre saath jo royā sahāb aisā thā

nazar meñ koī samundar kabhī samāyā nahīñ

magar vajūd hamārā habāb aisā thā

raheñ nigāh meñ mub.ham haqīqateñ sab kī

har ek chehre pe dohrā naqāb aisā thā

pareshāñ kartī hai rah rah ke ab bhī vo ḳhushbū

vafā-shi.ār vo rashk-e-gulāb aisā thā

kitāb dār-o-rasan tak hī paḌh sake aksar

kamāl-e-ishq kā mushkil nisāb aisā thā

zamāna guzrā magar ab bhī hai vo dard-e-jigar

azal se dil kā mire intiḳhāb aisā thā

zamāna aaj bhī izzat se naam letā hai

'nazīr' aap kā ḳhāna-ḳharāb aisā thā

kasak thi dil mein abhi iztirab aisa tha

hamare pas tha koi ki KHwab aisa tha

mere junun ko fazilat-maab tum ne kiya

jahan-e-ishq mein kis ka KHitab aisa tha

laga ki aankh hi pathra gai hai nargis ki

hamare sath jo roya sahab aisa tha

nazar mein koi samundar kabhi samaya nahin

magar wajud hamara habab aisa tha

rahen nigah mein mubham haqiqaten sab ki

har ek chehre pe dohra naqab aisa tha

pareshan karti hai rah rah ke ab bhi wo KHushbu

wafa-shiar wo rashk-e-gulab aisa tha

kitab dar-o-rasan tak hi paDh sake aksar

kamal-e-ishq ka mushkil nisab aisa tha

zamana guzra magar ab bhi hai wo dard-e-jigar

azal se dil ka mere intiKHab aisa tha

zamana aaj bhi izzat se nam leta hai

'nazir' aap ka KHana-KHarab aisa tha