kashakash-e-gham-e-lail-o-nahaar se niklen

kashākash-e-ġham-e-lail-o-nahār se nikleñ

ho ḳhatm umr to is karbzār se nikleñ

tilism-e-ḳhud-nigarī toḌ kar tū bāhar aa

to ham bhī apnī anā ke hisār se nikleñ

hamāre aks meñ dhundlāhaTeñ haiñ maazī kī

ġhubār dil kā chhaTe to ġhubār se nikleñ

vahāñ bhī saḳht masā.il kā sāmnā hogā

to kis umiid pe is regzār se nikleñ

ham apnī had se tajāvuz to kar nahīñ sakte

huzūr aap hī qaid-e-vaqār se nikleñ

samajh lo zauq-e-adab par ma.āsh haavī hai

jarīde shahr meñ jab ishtihār se nikleñ

kashakash-e-gham-e-lail-o-nahaar se niklen

ho KHatm umr to is karbzar se niklen

tilism-e-KHud-nigari toD kar tu bahar aa

to hum bhi apni ana ke hisar se niklen

hamare aks mein dhundlahaTen hain mazi ki

ghubar dil ka chhaTe to ghubar se niklen

wahan bhi saKHt masail ka samna hoga

to kis umid pe is regzar se niklen

hum apni had se tajawuz to kar nahin sakte

huzur aap hi qaid-e-waqar se niklen

samajh lo zauq-e-adab par maash hawi hai

jaride shahr mein jab ishtihaar se niklen