kashish to ab bhi ghazab ki hai nazninon mein

kashish to ab bhī ġhazab kī hai nāznīnoñ meñ

magar vo chāñd chamaktā nahīñ jabīnoñ meñ

ye sab ke chehroñ meñ yaksāniyat sī kaisī hai

hasīn-tar koī jachtā nahīñ hasīnoñ meñ

jo mere zehn meñ thī sabza-zār ḳhvāb meñ thī

kahāñ vo fasl ugaa.ī ga.ī zamīnoñ meñ

shu.ūr-e-umr se afzūñ huī hai umr-e-shu.ūr

hamāre saal guzarne lage mahīnoñ meñ

zabāñ se roz maiñ tā.īd-e-izn kartā huuñ

chhupe haiñ but bhī magar merī āstīnoñ meñ

numā.isheñ na furūī takallufāt yahāñ

kahāñ tum aa ga.e ham boriyā-nashīnoñ meñ

ba-juz tumhāre nahīñ koī ḳhānqāhī ab

maiñ kis kā naam likhūñ apne nukta-chīnoñ meñ

kashish to ab bhi ghazab ki hai nazninon mein

magar wo chand chamakta nahin jabinon mein

ye sab ke chehron mein yaksaniyat si kaisi hai

hasin-tar koi jachta nahin hasinon mein

jo mere zehn mein thi sabza-zar KHwab mein thi

kahan wo fasl ugai gai zaminon mein

shuur-e-umr se afzun hui hai umr-e-shuur

hamare sal guzarne lage mahinon mein

zaban se roz main taid-e-izn karta hun

chhupe hain but bhi magar meri aastinon mein

numaishen na furui takallufat yahan

kahan tum aa gae hum boriya-nashinon mein

ba-juz tumhaare nahin koi KHanqahi ab

main kis ka nam likhun apne nukta-chinon mein