kashmakash yun to musalsal hi zamane se rahi

kashmakash yuuñ to musalsal hī zamāne se rahī

aap ke ahd meñ kuchh aur bahāne se rahī

zindagī dard kā me.aar baḌhāne se rahī

ham na ro.eñ to hañsī ġhair ko aane se rahī

ḳhud hī kuchh ḳhuun jalāo ki ujālā ho jaa.e

sham.a to ḳhāna-e-be-nūr tak aane se rahī

sabr vāloñ kī zabāñ vaqt bhī ban jaatā hai

merī īzā-talabī baat baḌhāne se rahī

be-jhijak rang uchhāleñ chamanistāñ vaale

ġham-nasīboñ kī ḳhabar lauT ke aane se rahī

ham to barbād-e-nasheman hue lekin sayyād

ḳhud chaman kī bhī koī chiiz Thikāne se rahī

sāhab-e-vaqt ġharīboñ se khaTaktā kyoñ hai

muflisī tāj-e-mah-o-mehr to paane se rahī

aap kitne hī parastār-e-vafā hoñ 'anjum'

zindagī aap ko mahbūb banāne se rahī

kashmakash yun to musalsal hi zamane se rahi

aap ke ahd mein kuchh aur bahane se rahi

zindagi dard ka mear baDhane se rahi

hum na roen to hansi ghair ko aane se rahi

KHud hi kuchh KHun jalao ki ujala ho jae

shama to KHana-e-be-nur tak aane se rahi

sabr walon ki zaban waqt bhi ban jata hai

meri iza-talabi baat baDhane se rahi

be-jhijak rang uchhaalen chamanistan wale

gham-nasibon ki KHabar lauT ke aane se rahi

hum to barbaad-e-nasheman hue lekin sayyaad

KHud chaman ki bhi koi chiz Thikane se rahi

sahab-e-waqt gharibon se khaTakta kyon hai

muflisi taj-e-mah-o-mehr to pane se rahi

aap kitne hi parastar-e-wafa hon 'anjum'

zindagi aap ko mahbub banane se rahi