کشتی رواں ہے اور جسارت سفر کی ہے

کشتی رواں ہے اور جسارت سفر کی ہے

موجوں میں بیکلی کسی تازہ بھنور کی ہے

غنچہ کلی بہار کرن سب ہیں مجھ میں گم

لیکن تلاش مجھ کو جہان دگر کی ہے

نکلے ہیں اس کی کھوج میں جس کا پتہ نہیں

یہ کیفیت انوکھی ہمارے سفر کی ہے

شہر ہوس کو اب بھی مرا انتظار ہے

میرے جنوں کو چاہ ترے سنگ در کی ہے

ہم فاصلوں کی بندشیں توڑیں تو کس طرح

منزل جو بے نشان ہمارے سفر کی ہے

دن روشنی سمیٹ کے سورج کو دے چکا

تاروں کو فکر پھر بھی نمود سحر کی ہے