kasrat-e-wahdaniyat mein husn ki tanwir dekh

kasrat-e-vahdāniyat meñ husn kī tanvīr dekh

dīda-e-haq-bīñ se rañg-e-ālam-e-tasvīr dekh

is qadar khiñchnā nahīñ achchhā but-e-be-pīr dekh

pyaar kī nazroñ se sū-e-āshiq-e-dil-gīr dekh

ġhair ne mujh par sitam Dhaa.e haiñ Dhāle aaj tū

rah na jaa.e koī bhī tarkash meñ baaqī tiir dekh

kaam ban ban kar bigaḌ jaate haiñ lākhoñ raat din

kis qadar hai mujh se bargashta mirī taqdīr dekh

phir na ye kahnā ki ḳhat likkhā hai kis ne ġhair ko

le ye hai maujūd tere haath kī tahrīr dekh

hārnā himmat dalīl-e-kāmyābī se hai duur

kaam le tadbīr se phir ḳhūbi-e-taqdīr dekh

gumbad-e-gardūñ sambhal ai gumbad-e-gardūñ sambhal

kar na de sad paash tīr-e-āh par tāsīr dekh

chaar din kī zindagī par musht-e-ḳhāk itnā ġhurūr

piis degā ek din ye āsmān-e-pīr dekh

be-bulā.e to nahīñ aayā tirī mahfil meñ 'nāz'

dekh haañ haañ dekh apne haath kī tahrīr dekh

kasrat-e-wahdaniyat mein husn ki tanwir dekh

dida-e-haq-bin se rang-e-alam-e-taswir dekh

is qadar khinchna nahin achchha but-e-be-pir dekh

pyar ki nazron se su-e-ashiq-e-dil-gir dekh

ghair ne mujh par sitam Dhae hain Dhaale aaj tu

rah na jae koi bhi tarkash mein baqi tir dekh

kaam ban ban kar bigaD jate hain lakhon raat din

kis qadar hai mujh se bargashta meri taqdir dekh

phir na ye kahna ki KHat likkha hai kis ne ghair ko

le ye hai maujud tere hath ki tahrir dekh

haarna himmat dalil-e-kaamyabi se hai dur

kaam le tadbir se phir KHubi-e-taqdir dekh

gumbad-e-gardun sambhal ai gumbad-e-gardun sambhal

kar na de sad pash tir-e-ah par tasir dekh

chaar din ki zindagi par musht-e-KHak itna ghurur

pis dega ek din ye aasman-e-pir dekh

be-bulae to nahin aaya teri mahfil mein 'naz'

dekh han han dekh apne hath ki tahrir dekh