kaT gain jab josh-e-izhaar-e-hunar mein ungliyan

kaT ga.iiñ jab josh-e-iz.hār-e-hunar meñ uñgliyāñ

tab kahīñ Dūbīñ mire ḳhūn-e-jigar meñ uñgliyāñ

dekhiye anjām kyā ho ab vafā kī raah par

ham pe to uTThī haiñ āġhāz-e-safar meñ uñgliyāñ

āḳhir-e-shab meñ diyā ḳhud ko banāyā thā kabhī

aaj bhī jaltī haiñ ummīd-e-sahar meñ uñgliyāñ

likh rahī haiñ reg-e-sāhil par anokhī ḳhvāhisheñ

aa ga.ī haiñ terī bātoñ ke asar meñ uñgliyāñ

raushnī likkhī hai maiñ ne go mujhe mālūm thā

kaaT dī jaatī haiñ is andhe nagar meñ uñgliyāñ

laash ke hāthoñ pe haiñ kaise nishāñ zanjīr ke

kis kī jānib uTh rahī haiñ is ḳhabar meñ uñgliyāñ

kaT gain jab josh-e-izhaar-e-hunar mein ungliyan

tab kahin Dubin mere KHun-e-jigar mein ungliyan

dekhiye anjam kya ho ab wafa ki rah par

hum pe to uTThi hain aaghaz-e-safar mein ungliyan

aaKHir-e-shab mein diya KHud ko banaya tha kabhi

aaj bhi jalti hain ummid-e-sahar mein ungliyan

likh rahi hain reg-e-sahil par anokhi KHwahishen

aa gai hain teri baaton ke asar mein ungliyan

raushni likkhi hai main ne go mujhe malum tha

kaT di jati hain is andhe nagar mein ungliyan

lash ke hathon pe hain kaise nishan zanjir ke

kis ki jaanib uTh rahi hain is KHabar mein ungliyan