کٹا پھٹا تھا مرمت کیا گیا ہوں میں

کٹا پھٹا تھا مرمت کیا گیا ہوں میں

ادھیڑنے کے لئے پھر سیا گیا ہوں میں

پڑا فضول تھا قدرت کے کارخانے میں

اسی لئے ہی تو خود کو دیا گیا ہوں میں

نگلنا جب ہوا مشکل مری حقیقت کو

تو کڑوے گھونٹ کی صورت پیا گیا ہوں میں

مری کہانی کا تو خود خدا مصنف تھا

کسی کہانی سے کیسے لیا گیا ہوں میں

مرا جنم تھا کسی اور ہی زمانے کا

پھر اس زمانے میں کیسے جیا گیا ہوں میں

امانتوں میں خیانت کیا نہیں کرتے

ہوا کے ہاتھ پہ رکھ کر دیا گیا ہوں میں