kaun ab dekhe falak tera qamar aaj ki raat

kaun ab dekhe falak terā qamar aaj kī raat

un ke ruḳh se hī nahīñ haTtī nazar aaj kī raat

aap rah rah ke mirī samt na dekho varna

sab ko ho jā.egī ulfat kī ḳhabar aaj kī raat

bad-gumāñ un ko kahīñ kar na deñ ahbāb mire

lag rahā hai mujhe is baat kā Dar aaj kī raat

un kī rusvā.ī kā hotā na agar ḳhauf mujhe

maiñ had-e-ishq se bhī jaatā guzar aaj kī raat

ḳhuun ho jā.egā barsoñ ke yaqīn-e-dil kā

kar ke va.ada na tū lillāh mukar aaj kī raat

sajda maqbūl ho yā ho na ġharaz kyā is se

rakh diyā yaar kī dahlīz pe sar aaj kī raat

baa'd muddat milī 'tasdīq' hameñ tanhā.ī

mā-sivā pyaar koī baat na kar aaj kī raat

kaun ab dekhe falak tera qamar aaj ki raat

un ke ruKH se hi nahin haTti nazar aaj ki raat

aap rah rah ke meri samt na dekho warna

sab ko ho jaegi ulfat ki KHabar aaj ki raat

bad-guman un ko kahin kar na den ahbab mere

lag raha hai mujhe is baat ka Dar aaj ki raat

un ki ruswai ka hota na agar KHauf mujhe

main had-e-ishq se bhi jata guzar aaj ki raat

KHun ho jaega barson ke yaqin-e-dil ka

kar ke wada na tu lillah mukar aaj ki raat

sajda maqbul ho ya ho na gharaz kya is se

rakh diya yar ki dahliz pe sar aaj ki raat

ba'd muddat mili 'tasdiq' hamein tanhai

ma-siwa pyar koi baat na kar aaj ki raat