kaun batae kya hai haqiqat aur bana afsana kya

kaun batā.e kyā hai haqīqat aur banā afsāna kyā

dil kī bastī kyā bastī hai basnā kyā luT jaanā kyā

barsoñ ne jo rishte joḌe pal bhar ne vo toḌ diye

pyāre! ab TuuTe TukḌoñ se apnā jī bahlānā kyā

aaj to jūñ-tūñ kaT jā.egā kal kī socho kyā hogā

jo guzrī so guzar chukī itrānā kyā pachhtānā kyā

kaisā tūfāñ kaisī balā.eñ yāro! ye bhī socho to

sīkhā hai mar mar ke jiinā jīte-jī mar jaanā kyā

jaane kitne Dūbne vaale sāhil par bhī Duub ga.e

pyāre! tūfānoñ meñ rah kar itnā bhī ghabrānā kyā

tanhā tanhā jī ke dekhā saath bhī jī ke dekh liyā

ham ne kyā samjhā hai jiinā auroñ ko samjhānā kyā

sūd-o-ziyāñ kī bāteñ chhoḌo aur hī bāteñ chheḌo bhī

ishq ke hāthoñ kyā khoyā hai kyā paayā dohrānā kyā

apnī rām-kahānī meñ bhī jag-bītī kā jaadū thā

palkeñ jhapkī jaatī haiñ ab ḳhatm huā afsāna kyā

kaun batae kya hai haqiqat aur bana afsana kya

dil ki basti kya basti hai basna kya luT jaana kya

barson ne jo rishte joDe pal bhar ne wo toD diye

pyare! ab TuTe TukDon se apna ji bahlana kya

aaj to jun-tun kaT jaega kal ki socho kya hoga

jo guzri so guzar chuki itrana kya pachhtana kya

kaisa tufan kaisi balaen yaro! ye bhi socho to

sikha hai mar mar ke jina jite-ji mar jaana kya

jaane kitne Dubne wale sahil par bhi Dub gae

pyare! tufanon mein rah kar itna bhi ghabrana kya

tanha tanha ji ke dekha sath bhi ji ke dekh liya

hum ne kya samjha hai jina auron ko samjhana kya

sud-o-ziyan ki baaten chhoDo aur hi baaten chheDo bhi

ishq ke hathon kya khoya hai kya paya dohrana kya

apni ram-kahani mein bhi jag-biti ka jadu tha

palken jhapki jati hain ab KHatm hua afsana kya