kaun darwaza khula rakhta barae intizar

kaun darvāza khulā rakhtā barā.e intizār

raat gahrī ho chalī rahrav abas hai kal pukār

aañkh jal jaatī hai lekin ḳhvāb jhulsātī nahīñ

surma.ī Dherī kī ḳhunkī se janam legī bahār

kaun dasht-e-karb ke āzār kā aadī huā

kaun jā paayā hai bahr-e-dard kī maujoñ ke paar

rañj meñ lipTā rahā mahtāb kā ġhamgīñ badan

raat Tairis par koī sajde maiñ royā zār-zār

ab kisī shikve-gile kī koī gunjā.ish nahīñ

aap apne haath se sauñpā thā us ko iḳhtiyār

kaifiyat kī pūchh mat hamdam ki lutf-e-qurb se

aaj kuchh baḌh kar hai apne andarūñ bahtā ḳhumār

shāhzādī rauzan-e-zindāñ se rah taktī rahī

shahr kī raḳhshandagī meñ kho gayā ik shahsavār

ik nazar kā mo.ajiza mere qalam kā sab hunar

ik sunahrī dhyān se barsī hai nazmoñ kī phuvār

kaun darwaza khula rakhta barae intizar

raat gahri ho chali rahraw abas hai kal pukar

aankh jal jati hai lekin KHwab jhulsati nahin

surmai Dheri ki KHunki se janam legi bahaar

kaun dasht-e-karb ke aazar ka aadi hua

kaun ja paya hai bahr-e-dard ki maujon ke par

ranj mein lipTa raha mahtab ka ghamgin badan

raat Tairis par koi sajde main roya zar-zar

ab kisi shikwe-gile ki koi gunjaish nahin

aap apne hath se saunpa tha us ko iKHtiyar

kaifiyat ki puchh mat hamdam ki lutf-e-qurb se

aaj kuchh baDh kar hai apne andarun bahta KHumar

shahzadi rauzan-e-zindan se rah takti rahi

shahr ki raKHshandagi mein kho gaya ek shahsawar

ek nazar ka moajiza mere qalam ka sab hunar

ek sunahri dhyan se barsi hai nazmon ki phuwar