kaun hai jo dard banTe raat ke is pahr mein

kaun hai jo dard bāñTe raat ke is pahr meñ

hai koī jo jāgtā ho is samay bhī shahr meñ

bai'at-e-sānī pe maa.il hai mirā ranjūr dil

gar mayassar dūsrā koī ḳhudā ho dahr meñ

shauq se piite haiñ aur rahte haiñ phir ehsānmand

dushmanoñ ne kyā milāyā hai hamāre zahr meñ

qatra qatra yuuñ milāyā us ko dariyā kar diyā

terī yādoñ ne baras kar mere ġham kī nahr meñ

hijr meñ ro.eñ bhalā kaahe jahāñ ābād hai

terī apnī mauj hai aur ham haiñ apnī lahr meñ

merī ḳhāmoshī faqat merī vaz.a-dārī nahīñ

saañs aa paa.e to bolūñ jabr meñ aur qahr meñ

ḳhuuñ mire lafzoñ se Tapkā aur misra ban gayā

go hai mumkin mas.ala ho vazn meñ aur bahr meñ

kaun hai jo dard banTe raat ke is pahr mein

hai koi jo jagta ho is samay bhi shahr mein

bai'at-e-sani pe mail hai mera ranjur dil

gar mayassar dusra koi KHuda ho dahr mein

shauq se pite hain aur rahte hain phir ehsanmand

dushmanon ne kya milaya hai hamare zahr mein

qatra qatra yun milaya us ko dariya kar diya

teri yaadon ne baras kar mere gham ki nahr mein

hijr mein roen bhala kahe jahan aabaad hai

teri apni mauj hai aur hum hain apni lahr mein

meri KHamoshi faqat meri waza-dari nahin

sans aa pae to bolun jabr mein aur qahr mein

KHun mere lafzon se Tapka aur misra ban gaya

go hai mumkin masala ho wazn mein aur bahr mein