kaun hai jo na hua bandish-e-gham se aazad

kaun hai jo na huā bandish-e-ġham se āzād

juz mire kaun rahā dahr meñ nākām-e-murād

sauñp duuñ kyuuñ na ba-dāmān-e-talātum kashtī

kis kī kab sunte haiñ be-rahm kināre fariyād

mujh se mat chhīn ye jāgīr-e-ġham-o-ranj nadīm

hai faqat is se hī kaunain-e-dil-o-jān ābād

dil ke gulzār meñ khil uThtī hai dāġhoñ kī kalī

jab bhī aatī hai kisī gul-ruḳh-o-gul-fām kī yaad

ab na maazī hī kā ġham hai na to fardā kī ḳhushī

ḳhāna-e-dil ko kiyā tum ne kuchh aisā barbād

ek lamha bhī masarrat kā mayassar na huā

jaane kis vaqt mohabbat kī rakhī thī buniyād

ġham ġhalat karne ko aayā thā tire dar pe 'jamāl'

kyā ḳhabar thī ki nahīñ tū bhī ġhamoñ se āzād

kaun hai jo na hua bandish-e-gham se aazad

juz mere kaun raha dahr mein nakaam-e-murad

saunp dun kyun na ba-daman-e-talatum kashti

kis ki kab sunte hain be-rahm kinare fariyaad

mujh se mat chhin ye jagir-e-gham-o-ranj nadim

hai faqat is se hi kaunain-e-dil-o-jaan aabaad

dil ke gulzar mein khil uThti hai daghon ki kali

jab bhi aati hai kisi gul-ruKH-o-gul-fam ki yaad

ab na mazi hi ka gham hai na to farda ki KHushi

KHana-e-dil ko kiya tum ne kuchh aisa barbaad

ek lamha bhi masarrat ka mayassar na hua

jaane kis waqt mohabbat ki rakhi thi buniyaad

gham ghalat karne ko aaya tha tere dar pe 'jamal'

kya KHabar thi ki nahin tu bhi ghamon se aazad