کون ہے کس کا سراپا نظر آتا ہے مجھے

کون ہے کس کا سراپا نظر آتا ہے مجھے

کون یہ خواب میں ہر وقت ڈراتا ہے مجھے

کر سکا ان سے نہ کچھ بات بوقت رخصت

یہی احساس اکیلے میں رلاتا ہے مجھے

پیش خیمہ کسی سازش کا نظر آتا ہے

دور سے جب کوئی آئینہ دکھاتا ہے مجھے

دوڑ پڑتا ہوں بڑے پیار سے بے خوف و خطر

کوئی چہرہ جو محبت سے بلاتا ہے مجھے

غور سے سنتا ہوں سر دھنتا ہوں رو پڑتا ہوں

جب کوئی نغمۂ پر درد سناتا ہے مجھے

گرد آلود فضا میں دل دیوانہ مرا

شوق پرواز کے انداز سکھاتا ہے مجھے

جانے کیوں شہر تمنا میں کمالؔ اپنی طرح

آج ہر شخص پریشاں نظر آتا ہے مجھے