kaun hai kis ka ye paigham hai kya arz karun

kaun hai kis kā ye paiġhām hai kyā arz karūñ

zindagī nāma-e-gumnām hai kyā arz karūñ

de ke vo da.avat-e-nazzāra jahāñ phir na milā

ye vahī jalva-gah-e-ām hai kyā arz karūñ

zindagī us ne badal kar mirī rakh dī aisī

na mujhe chain na ārām hai kyā arz karūñ

hasrat-o-yās kā maskan hai mirā ḳhāna-e-dil

suunā suunā ye dar-o-bām hai kyā arz karūñ

aage pīchhe hai mire ek masā.ib kā hujūm

aaj nākāmī bahar-gām hai kyā arz karūñ

merī qismat meñ likhī tishna-labī hai shāyad

us ke hāthoñ meñ bharā jaam hai kyā arz karūñ

jab se vo ḳhāna-bar-andāz hai sargarm-e-amal

jis taraf dekhiye kohrām hai kyā arz karūñ

sub.h-e-ummīd kab aa.egī na jaane 'barqī'

muztarib dil ye sar-e-shām hai kyā arz karūñ

kaun hai kis ka ye paigham hai kya arz karun

zindagi nama-e-gumnam hai kya arz karun

de ke wo dawat-e-nazzara jahan phir na mila

ye wahi jalwa-gah-e-am hai kya arz karun

zindagi us ne badal kar meri rakh di aisi

na mujhe chain na aaram hai kya arz karun

hasrat-o-yas ka maskan hai mera KHana-e-dil

suna suna ye dar-o-baam hai kya arz karun

aage pichhe hai mere ek masaib ka hujum

aaj nakaami bahar-gam hai kya arz karun

meri qismat mein likhi tishna-labi hai shayad

us ke hathon mein bhara jam hai kya arz karun

jab se wo KHana-bar-andaz hai sargarm-e-amal

jis taraf dekhiye kohram hai kya arz karun

subh-e-ummid kab aaegi na jaane 'barqi'

muztarib dil ye sar-e-sham hai kya arz karun