کون ہے قوم کا معمار چلو دیکھیں گے

کون ہے قوم کا معمار چلو دیکھیں گے

کس میں ہے جذبۂ ایثار چلو دیکھیں گے

جن کے سائے میں بڑا دل کو سکوں ملتا تھا

کیا سلامت ہیں وہ اشجار چلو دیکھیں گے

وقت کی دھند میں ممکن ہے بچھڑ جائے گا

آدمی جو ہے ملنسار چلو دیکھیں گے

قدرداں اس کے ہنر کے ہیں ہزاروں پھر بھی

کیوں پریشان ہے فنکار چلو دیکھیں گے

ایک ہی گھر میں رہا کرتے تھے دونوں بھائی

کیوں کھڑی ہو گئی دیوار چلو دیکھیں گے

در و دیوار عمارت کے تو فولادی تھے

ہو گئی کیسے وہ مسمار چلو دیکھیں گے

اس کی گفتاری میں شامل ہے صداقت کی مہک

کون ہے صاحب کردار چلو دیکھیں گے

پیٹھ پہ وار نہیں کرتا سپاہی کوئی

کون ہے فوج کا سالار چلو دیکھیں گے

جس کی عظمت کا بیاں تم نے سنا ہے اے عزیزؔ

اپنی آنکھوں سے وہ دربار چلو دیکھیں گے