kaun hai qaum ka meamar chalo dekhenge

kaun hai qaum kā me.amār chalo dekheñge

kis meñ hai jazba-e-īsār chalo dekheñge

jin ke saa.e meñ baḌā dil ko sukūñ miltā thā

kyā salāmat haiñ vo ashjār chalo dekheñge

vaqt kī dhuñd meñ mumkin hai bichhaḌ jā.egā

aadmī jo hai milansār chalo dekheñge

qadr-dāñ us ke hunar ke haiñ hazāroñ phir bhī

kyoñ pareshān hai fan-kār chalo dekheñge

ek hī ghar meñ rahā karte the donoñ bhaa.ī

kyoñ khaḌī ho ga.ī dīvār chalo dekheñge

dar-o-dīvār imārat ke to faulādī the

ho ga.ī kaise vo mismār chalo dekheñge

us kī guftārī meñ shāmil hai sadāqat kī mahak

kaun hai sāhib-e-kirdār chalo dekheñge

piiTh pe vaar nahīñ kartā sipāhī koī

kaun hai fauj kā sālār chalo dekheñge

jis kī azmat kā bayāñ tum ne sunā hai ai 'azīz'

apnī āñkhoñ se vo darbār chalo dekheñge

kaun hai qaum ka meamar chalo dekhenge

kis mein hai jazba-e-isar chalo dekhenge

jin ke sae mein baDa dil ko sukun milta tha

kya salamat hain wo ashjar chalo dekhenge

waqt ki dhund mein mumkin hai bichhaD jaega

aadmi jo hai milansar chalo dekhenge

qadr-dan us ke hunar ke hain hazaron phir bhi

kyon pareshan hai fan-kar chalo dekhenge

ek hi ghar mein raha karte the donon bhai

kyon khaDi ho gai diwar chalo dekhenge

dar-o-diwar imarat ke to fauladi the

ho gai kaise wo mismar chalo dekhenge

us ki guftari mein shamil hai sadaqat ki mahak

kaun hai sahib-e-kirdar chalo dekhenge

piTh pe war nahin karta sipahi koi

kaun hai fauj ka salar chalo dekhenge

jis ki azmat ka bayan tum ne suna hai ai 'aziz'

apni aankhon se wo darbar chalo dekhenge