kaun hai uske bankpan ki tarah

kaun hai us ke bāñkpan kī tarah

husn hai husn-e-anjuman kī tarah

maiñ ne maḳhmūr us ko dekhā hai

raat jaagī huī dulhan kī tarah

jaage jaage tire badan ke ḳhutūt

khil-khilāte hue chaman kī tarah

ik mire chāñd ke na hone se

chāñdnī raat hai kafan kī tarah

ishq shā.ista-e-junūñ niklā

tere māthe kī ik shikan kī tarah

koī tārīḳh-e-ishq dohrā duuñ

zindagānī hai kohkan kī tarah

koī ban-Than ke ghar se niklā hai

zindagī ke hasīñ chalan kī tarah

pairahan aur aise unvāñ se

rañg-o-gulhā-e-pairahan kī tarah

kaisī vīrāniyāñ meñ 'daur' yahāñ

zindagī hai ujaaḌ ban kī tarah

kaun hai us ke bankpan ki tarah

husn hai husn-e-anjuman ki tarah

main ne maKHmur us ko dekha hai

raat jagi hui dulhan ki tarah

jage jage tere badan ke KHutut

khil-khilate hue chaman ki tarah

ek mere chand ke na hone se

chandni raat hai kafan ki tarah

ishq shaista-e-junun nikla

tere mathe ki ek shikan ki tarah

koi tariKH-e-ishq dohra dun

zindagani hai kohkan ki tarah

koi ban-Than ke ghar se nikla hai

zindagi ke hasin chalan ki tarah

pairahan aur aise unwan se

rang-o-gulha-e-pairahan ki tarah

kaisi viraniyan mein 'daur' yahan

zindagi hai ujaD ban ki tarah