kaun hun kyun zinda hun sochta rahta hun

kaun huuñ kyuuñ zinda huuñ sochtā rahtā huuñ

ḳhvāboñ kī duniyā meñ jāgtā rahtā huuñ

rañg aur ḳhushbū se dhundlā.e rastoñ meñ

havā kī uñglī thaam ke chaltā rahtā huuñ

āvāzoñ kī gaThrī sar pe uThā.e hue

ḳhāmoshī ke ziine chaḌhtā rahtā huuñ

jahāñ se mere jism ko ik din ugnā hai

maiñ us bāñjh zamīn ko DhūñDhtā rahtā huuñ

āñkhoñ kī uryānī se chhupne ke liye

na.e na.e malbūs pahantā rahtā huuñ

sub.h-o-shām havā kī andhī lahroñ meñ

zarra zarra ho ke bikhartā rahtā huuñ

soī huī rāhoñ meñ tanhā chāñd ke saath

saarī saarī raat bhaTaktā rahtā huuñ

lauh-e-jahāñ par bantī bigaḌtī tahrīreñ

dekhtā rahtā huuñ aur sochtā rahtā huuñ

jism-o-jāñ kī dhuup se jalte sahrā meñ

apnā saaya oḌh ke chaltā rahtā huuñ

kaun hun kyun zinda hun sochta rahta hun

KHwabon ki duniya mein jagta rahta hun

rang aur KHushbu se dhundlae raston mein

hawa ki ungli tham ke chalta rahta hun

aawazon ki gaThri sar pe uThae hue

KHamoshi ke zine chaDhta rahta hun

jahan se mere jism ko ek din ugna hai

main us banjh zamin ko DhunDhta rahta hun

aankhon ki uryani se chhupne ke liye

nae nae malbus pahanta rahta hun

subh-o-sham hawa ki andhi lahron mein

zarra zarra ho ke bikharta rahta hun

soi hui rahon mein tanha chand ke sath

sari sari raat bhaTakta rahta hun

lauh-e-jahan par banti bigaDti tahriren

dekhta rahta hun aur sochta rahta hun

jism-o-jaan ki dhup se jalte sahra mein

apna saya oDh ke chalta rahta hun