kaun kahta hai ke har shaKHs farishta ho jae

kaun kahtā hai ke har shaḳhs farishta ho jaa.e

aadmī thoḌā to insān ke jaisā ho jaa.e

kitnā ma.asūm nazar aatā thā bachpan meñ mire

aa.ine meñ mirā phir se vahī chehra ho jaa.e

phir balā koī mere paas se guzre kaise

jab duā maañ kī mire sar kā dupaTTa ho jaa.e

āñdhiyoñ ko ye gumāñ hai ki bujhā deñgī charāġh

aur charāġhoñ ko ye zid hai ki ujālā ho jaa.e

TuuT saktā hai kisī pal bhī samundar kā ġhurūr

muñh agar moḌ leñ dariyā to ye pyāsā ho jaa.e

joḌnā aatā hai TuuTe hue shīshoñ ko mujhe

bas jo baal aa.e duā ye hai ki dhuñdlā ho jaa.e

bad-duā kab thī magar haañ mujhe aayā thā ḳhayāl

ishq jis se hai use vo bhī kisī kā ho jaa.e

kaun kahta hai ke har shaKHs farishta ho jae

aadmi thoDa to insan ke jaisa ho jae

kitna masum nazar aata tha bachpan mein mere

aaine mein mera phir se wahi chehra ho jae

phir bala koi mere pas se guzre kaise

jab dua man ki mere sar ka dupaTTa ho jae

aandhiyon ko ye guman hai ki bujha dengi charagh

aur charaghon ko ye zid hai ki ujala ho jae

TuT sakta hai kisi pal bhi samundar ka ghurur

munh agar moD len dariya to ye pyasa ho jae

joDna aata hai TuTe hue shishon ko mujhe

bas jo baal aae dua ye hai ki dhundla ho jae

bad-dua kab thi magar han mujhe aaya tha KHayal

ishq jis se hai use wo bhi kisi ka ho jae