kaun kahta hai ki teri chashm-e-hairani mein hai

kaun kahtā hai ki terī chashm-e-hairānī meñ hai

vus'at-e-sahrā to merī chāk-dāmānī meñ hai

tū nahīñ miltā na mil is kā nahīñ shikva mujhe

jo ḳharābī hai vo terī zūd-paimānī meñ hai

saarī jāgīreñ yahīñ se bāñTtā rahtā huuñ maiñ

bādshāhī kā maza to dil kī sultānī meñ hai

hai jo parvāna to shab-bhar sho'la-e-raushan meñ rah

zindagī terī isī sham'-e-shabistānī meñ hai

aañkh kyā sīkhegī us ke sāmne aa.e baġhair

harf-e-hairat kā sabaq to ā.ina-ḳhvānī meñ hai

baiTh jaane de ise to maiñ nazar aa.uuñ tujhe

merā paikar bhī isī gard-e-bayābānī meñ hai

zikr bas merā hikāyat-nāma-e-vahshat meñ hai

mauj bas merī yam-e-sahrā kī tuġhyānī meñ hai

lutf jo pairāya-e-gang-o-jaman meñ hai 'anīs'

rang-e-chīñ meñ hai na vo sabk-e-ḳhurāsānī meñ hai

kaun kahta hai ki teri chashm-e-hairani mein hai

wus'at-e-sahra to meri chaak-damani mein hai

tu nahin milta na mil is ka nahin shikwa mujhe

jo KHarabi hai wo teri zud-paimani mein hai

sari jagiren yahin se banTta rahta hun main

baadshahi ka maza to dil ki sultani mein hai

hai jo parwana to shab-bhar sho'la-e-raushan mein rah

zindagi teri isi sham'-e-shabistani mein hai

aankh kya sikhegi us ke samne aae baghair

harf-e-hairat ka sabaq to aaina-KHwani mein hai

baiTh jaane de ise to main nazar aaun tujhe

mera paikar bhi isi gard-e-bayabani mein hai

zikr bas mera hikayat-nama-e-wahshat mein hai

mauj bas meri yam-e-sahra ki tughyani mein hai

lutf jo pairaya-e-gang-o-jaman mein hai 'anis'

rang-e-chin mein hai na wo sabk-e-KHurasani mein hai