kaun kahta mujhe shaista-e-tahzib-e-junun

kaun kahtā mujhe shā.ista-e-tahzīb-e-junūñ

maiñ tirī zulf-e-pareshāñ ko agar chheḌ na duuñ

kaun hasrat-zada-e-shauq-e-takallum hai yahāñ

laḌkhaḌātā hai tirī chashm-e-suḳhan-go kā fusūñ

ye hujūm-e-ġham-e-daurāñ meñ kahāñ yaad rahā

dāstān-e-ġham-e-dil tere taġhāful se kahūñ

kyā ḳhabar ḳhema-e-lailā ke nigahbānoñ ko

ki harīm-e-dil-e-lailā meñ hai mehmān-e-junūñ

rañg rah rah ke tire ruḳh kā uḌā jaatā hai

varna maiñ aur tirī mahfil-e-tamkīñ se uThūñ

qaid-e-hastī meñ ye ik gosha-e-dāmān-e-ḳhayāl

phir ġhanīmat hai ki zindāñ meñ bhī āzād to huuñ

ho salīqe se bahaknā to maza detā hai

mire saaqī ko gumāñ hai ki bahut hosh meñ huuñ

justujū kī koī manzil jo nahīñ hai to na ho

himmat-e-ishq ye kahtī hai ki baḌhtā hī rahūñ

ab tire haal pe tujh ko dil-e-nādāñ chhoḌā

sochnā bhī to qayāmat hai kahāñ tak sochūñ

maiñ ne pahchān liyā us ko sar-e-bazm 'ravish'

us kī āñkhoñ ko hai isrār ki ḳhāmosh rahūñ

kaun kahta mujhe shaista-e-tahzib-e-junun

main teri zulf-e-pareshan ko agar chheD na dun

kaun hasrat-zada-e-shauq-e-takallum hai yahan

laDkhaData hai teri chashm-e-suKHan-go ka fusun

ye hujum-e-gham-e-dauran mein kahan yaad raha

dastan-e-gham-e-dil tere taghaful se kahun

kya KHabar KHema-e-laila ke nigahbanon ko

ki harim-e-dil-e-laila mein hai mehman-e-junun

rang rah rah ke tere ruKH ka uDa jata hai

warna main aur teri mahfil-e-tamkin se uThun

qaid-e-hasti mein ye ek gosha-e-daman-e-KHayal

phir ghanimat hai ki zindan mein bhi aazad to hun

ho saliqe se bahakna to maza deta hai

mere saqi ko guman hai ki bahut hosh mein hun

justuju ki koi manzil jo nahin hai to na ho

himmat-e-ishq ye kahti hai ki baDhta hi rahun

ab tere haal pe tujh ko dil-e-nadan chhoDa

sochna bhi to qayamat hai kahan tak sochun

main ne pahchan liya us ko sar-e-bazm 'rawish'

us ki aankhon ko hai israr ki KHamosh rahun