kaun karta hai sar-e-zulf ki baaten dil mein

kaun kartā hai sar-e-zulf kī bāteñ dil meñ

jī pe kaTtī haiñ ajab tarah kī rāteñ dil meñ

koī tarkīb mulāqāt kī bantī nahīñ aur

vasl ke roz kiyā karte haiñ ghāteñ dil meñ

go hameñ tū ne ye zāhir meñ navāzā par ham

dhyān meñ apne tirī khāte haiñ lāteñ dil meñ

turfa shatrañj-e-mohabbat kī hai ġhā.eb baazī

shātir-e-ishq ko ho rahtī haiñ māteñ dil meñ

kaun sī ān-o-adā hai ki nahīñ jī ko lage

khub rahī haiñ vo tirī sab harakāteñ dil meñ

zaat gar pochhiye aadam kī to hai ek vahī

laakh yuuñ kahne ko Thahrā.iye zāteñ dil meñ

vasl kā saad bhī ho.egā 'hasan' sabr karo

daftar-e-ishq kī dauḌeñ haiñ barāteñ dil meñ

kaun karta hai sar-e-zulf ki baaten dil mein

ji pe kaTti hain ajab tarah ki raaten dil mein

koi tarkib mulaqat ki banti nahin aur

wasl ke roz kiya karte hain ghaten dil mein

go hamein tu ne ye zahir mein nawaza par hum

dhyan mein apne teri khate hain laten dil mein

turfa shatranj-e-mohabbat ki hai ghaeb bazi

shatir-e-ishq ko ho rahti hain maten dil mein

kaun si aan-o-ada hai ki nahin ji ko lage

khub rahi hain wo teri sab harakaten dil mein

zat gar pochhiye aadam ki to hai ek wahi

lakh yun kahne ko Thahraiye zaten dil mein

wasl ka sad bhi hoega 'hasan' sabr karo

daftar-e-ishq ki dauDen hain baraaten dil mein