کون مل جائے سر راہ گزر کس کو خبر

کون مل جائے سر راہ گزر کس کو خبر

کس کے ہم راہ کٹے کس کا سفر کس کو خبر

اس قدر قربتیں اچھی نہیں اے شمع سمجھ

کب بدل جائے ہواؤں کی نظر کس کو خبر

تو نے سینے سے جنہیں آج لگا رکھا ہے

دل سے وہ لوگ ہی جائیں نہ اتر کس کو خبر

ہے ابھی ذوق نظر سارے نظارے چن لو

کل رہے یا نہ رہے کار ہنر کس کو خبر

سوچ کر یار کسی کو بھی نصیحت کرنا

کون سی بات کرے کیسا اثر کس کو خبر

یہ جو طاقوں پہ دیے تا بہ سحر جلتے ہیں

کن اندھیروں سے ہوا ان کا گزر کس کو خبر

خواب آنکھوں میں پھر اس ڈر سے سجائے نہ گئے

ٹوٹ جائیں یہ کہیں بار دگر کس کو خبر