کون نظریں گڑائے چلمن میں

کون نظریں گڑائے چلمن میں

سب کی دلچسپیاں ہیں روزن میں

جانے کیا چل رہا ہے اس من میں

سر پھٹا جا رہا ہے الجھن میں

زندگی سازگار ہے ایسے

جیسے سوکھا پڑا ہو ساون میں

مجھ سے پوچھے بغیر ہوتا ہے

جو بھی ہوتا ہے میرے جیون میں

کتنی صدیوں سے جی رہے ہیں لوگ

رہنماؤں کے آشواسن میں

وہ نئی فصل کیا اگائیں گے

رزق جو ڈھونڈتے ہیں جوٹھن میں

کون ستہ سے اب سوال کرے

لوگ بکتے ہیں مفت راشن میں

عہد حاضر کو بھول کر شاعر

اب بھی الجھا ہوا ہے چلمن میں

کتنی سنجیدگی سے لوں خود کو

میں جو ہوں ایک آٹھ بلین میں