kaun sa din ki mujhe us se mulaqat nahin

kaun sā din ki mujhe us se mulāqāt nahīñ

lek jī chāhe hai juuñ milne ko vo baat nahīñ

aañkh laḌ jaa.e hai yuuñ ab bhī to us kī mahram

lek nazroñ meñ vo aage kī sī samkhāt nahīñ

jis jhamakḌe se ki nit chashm mirī Tapke hai

aisī jhaḌiyoñ se to barsī kabhī barsāt nahīñ

raunaq-e-bāda-parastī thī hamīñ tak jab se

ham ne kī tauba kahīñ nām-e-ḳharābāt nahīñ

shaiḳh kī dāḌhī kī jo kahiye baḌā.ī sach hai

is sivā aur par ik pashm karāmāt nahīñ

aa jo miltā hai to mil le tū ki fursat hai muft

ek chashmak meñ mirī jaan ye phir raat nahīñ

rakh tū sargoshī ke hiile ko to muñh par 'qā.em'

bosa lene kī is amboh meñ go ghaat nahīñ

kaun sa din ki mujhe us se mulaqat nahin

lek ji chahe hai jun milne ko wo baat nahin

aankh laD jae hai yun ab bhi to us ki mahram

lek nazron mein wo aage ki si samkhat nahin

jis jhamakDe se ki nit chashm meri Tapke hai

aisi jhaDiyon se to barsi kabhi barsat nahin

raunaq-e-baada-parasti thi hamin tak jab se

hum ne ki tauba kahin nam-e-KHarabaat nahin

shaiKH ki daDhi ki jo kahiye baDai sach hai

is siwa aur par ek pashm karamat nahin

aa jo milta hai to mil le tu ki fursat hai muft

ek chashmak mein meri jaan ye phir raat nahin

rakh tu sargoshi ke hile ko to munh par 'qaem'

bosa lene ki is amboh mein go ghat nahin