kaun sa gham hai mere dil mein jo mehman nahin

kaun sā ġham hai mire dil meñ jo mehmān nahīñ

mujh pe kam ye bhī mire yāroñ kā ehsān nahīñ

tīsha-e-vaqt ne har naqsh badal Daalā hai

kal kī tasvīr mirī aaj kī pahchān nahīñ

kam nahīñ mahr-e-daraḳhshāñ se mirā dāġh-e-jigar

matla.a-e-sub.h se kam merā garebān nahīñ

shahr-e-be-mehr meñ tū zaḳhm dikhātā hai kise

terā pursāñ koī yaañ ai dil-e-nādān nahīñ

aao mil baiTh ke ham baañT leñ bār-e-ġham-e-dil

fā.eda sab kā hai is meñ koī nuqsān nahīñ

dil meñ dar aa.e mire har koī dukh-dard samet

is meñ vus'at bhī hai aur dar pe bhī darbān nahīñ

rū-ba-rū aa.ine ke maiñ huuñ nazar vo aa.e

ho bhī saktā hai ye honā magar āsān nahīñ

dil meñ gar fikr-e-kam-o-besh na hove 'shāhid'

toda-e-ḳhāk kam-az taḳht-e-sulaimān nahīñ

kaun sa gham hai mere dil mein jo mehman nahin

mujh pe kam ye bhi mere yaron ka ehsan nahin

tisha-e-waqt ne har naqsh badal Dala hai

kal ki taswir meri aaj ki pahchan nahin

kam nahin mahr-e-daraKHshan se mera dagh-e-jigar

matla-e-subh se kam mera gareban nahin

shahr-e-be-mehr mein tu zaKHm dikhata hai kise

tera pursan koi yan ai dil-e-nadan nahin

aao mil baiTh ke hum banT len bar-e-gham-e-dil

faeda sab ka hai is mein koi nuqsan nahin

dil mein dar aae mere har koi dukh-dard samet

is mein wus'at bhi hai aur dar pe bhi darban nahin

ru-ba-ru aaine ke main hun nazar wo aae

ho bhi sakta hai ye hona magar aasan nahin

dil mein gar fikr-e-kam-o-besh na howe 'shahid'

toda-e-KHak kam-az taKHt-e-sulaiman nahin