kaun sa main jawaz dun surat-e-haal ke liye

kaun sā maiñ javāz duuñ sūrat-e-hāl ke liye

dast-e-saḳhī meñ kuchh nahīñ dast-e-savāl ke liye

apnī tabāhiyoñ pe bhī khul ke na ro sake kabhī

vaqt hī kab milā hameñ ranj-o-malāl ke liye

us se maiñ is tarah milā jaise mujhe pata nahīñ

kartā hai kaun sāzisheñ mere zavāl ke liye

tum bhī khiñche khiñche se the ham bhī bache bache rahe

donoñ hī zimmedār haiñ shīshe meñ baal ke liye

phūloñ ko har ghaḌī rahī kāñToñ se ḳhuun kī talab

thoḌā surūr ke liye thoḌā, jamāl ke liye

ab ke baras kī fasl bhī pichhle lagān meñ ga.ī

suud meñ faaqe rah ga.e ab ke bhī saal ke liye

kah do ye shahryār se dār-o-rasan saje raheñ

zulm-o-sitam bhī shart haiñ jāh-o-jalāl ke liye

kaun sa main jawaz dun surat-e-haal ke liye

dast-e-saKHi mein kuchh nahin dast-e-sawal ke liye

apni tabahiyon pe bhi khul ke na ro sake kabhi

waqt hi kab mila hamein ranj-o-malal ke liye

us se main is tarah mila jaise mujhe pata nahin

karta hai kaun sazishen mere zawal ke liye

tum bhi khinche khinche se the hum bhi bache bache rahe

donon hi zimmedar hain shishe mein baal ke liye

phulon ko har ghaDi rahi kanTon se KHun ki talab

thoDa surur ke liye thoDa, jamal ke liye

ab ke baras ki fasl bhi pichhle lagan mein gai

sud mein faqe rah gae ab ke bhi sal ke liye

kah do ye shahryar se dar-o-rasan saje rahen

zulm-o-sitam bhi shart hain jah-o-jalal ke liye