kaun se aalam mein le aaya hai mera dil mujhe

kaun se aalam meñ le aaya hai merā dil mujhe

DhūñDhtī phirtī hai har jānib merī manzil mujhe

maiñ to ik shīsha thā shahr-e-sang meñ kyoñ aa gayā

zinda rahnā ho gayā hai ab bahut mushkil mujhe

azm-e-mohkam ho to ban jaatā hai maqsad rāhbar

ḳhud sahārā degī fikr-e-dūrī-e-manzil mujhe

nāḳhudā se kyā ġharaz parvarda-e-tūfāñ huuñ maiñ

mauj ke dāman meñ aatā hai nazar sāhil mujhe

jo mire kal tak rahe the ham-ḳhayāl-o-ham-nigāh

aaj unheñ pahchānñā bhī hai bahut mushkil mujhe

sunñe vaalī baat thī behtar thā sunte aap bhī

mashvara kuchh de rahā thā aaj merā dil mujhe

ashk āñkhoñ meñ umañD aa.e añdherā chhā gayā

kuchh na sūjhā jab nazar aa.ī mirī manzil mujhe

zindagī ko be-haqīqat maiñ samajhtā thā kabhī

hai magar ab maut bhī andesha-e-bātil mujhe

mujh ko in taaza bahāroñ se hai kyā hāsil 'bahār'

har gul-e-ḳhandāñ nazar aatā hai zaḳhm-e-dil mujhe

kaun se aalam mein le aaya hai mera dil mujhe

DhunDhti phirti hai har jaanib meri manzil mujhe

main to ek shisha tha shahr-e-sang mein kyon aa gaya

zinda rahna ho gaya hai ab bahut mushkil mujhe

azm-e-mohkam ho to ban jata hai maqsad rahbar

KHud sahaara degi fikr-e-duri-e-manzil mujhe

naKHuda se kya gharaz parwarda-e-tufan hun main

mauj ke daman mein aata hai nazar sahil mujhe

jo mere kal tak rahe the ham-KHayal-o-ham-nigah

aaj unhen pahchanna bhi hai bahut mushkil mujhe

sunne wali baat thi behtar tha sunte aap bhi

mashwara kuchh de raha tha aaj mera dil mujhe

ashk aankhon mein umanD aae andhera chha gaya

kuchh na sujha jab nazar aai meri manzil mujhe

zindagi ko be-haqiqat main samajhta tha kabhi

hai magar ab maut bhi andesha-e-baatil mujhe

mujh ko in taza bahaaron se hai kya hasil 'bahaar'

har gul-e-KHandan nazar aata hai zaKHm-e-dil mujhe