kaun se dar par use deni hai dastak yaad hai

kaun se dar par use denī hai dastak yaad hai

har gadā ko apnī ḳhuddārī kā gāhak yaad hai

yaad hai bhīgā thā terā jism jab bārish ke baa'd

kis tarah toḌī thī maiñ ne apnī ainak yaad hai

bhuul baiThā huuñ kitāboñ aur clāssoñ ke sabaq

tum ne lekin jo paḌhāyā thā vo ab tak yaad hai

maiñ batātā huuñ tumhārī yaad rakhtā huuñ kahāñ

ye mire siine meñ jo hotī hai dhak-dhak yaad hai

is liye chup-chāp haiñ sab aadmī is zulm par

un ko mazlūmoñ kā maz.hab aur maslak yaad hai

shahr meñ aa.e to mujh se mil ke jaatī hai 'razā'

bad-nasībī ko azal se merī baiThak yaad hai

kaun se dar par use deni hai dastak yaad hai

har gada ko apni KHuddari ka gahak yaad hai

yaad hai bhiga tha tera jism jab barish ke ba'd

kis tarah toDi thi main ne apni ainak yaad hai

bhul baiTha hun kitabon aur classon ke sabaq

tum ne lekin jo paDhaya tha wo ab tak yaad hai

main batata hun tumhaari yaad rakhta hun kahan

ye mere sine mein jo hoti hai dhak-dhak yaad hai

is liye chup-chap hain sab aadmi is zulm par

un ko mazlumon ka mazhab aur maslak yaad hai

shahr mein aae to mujh se mil ke jati hai 'raza'

bad-nasibi ko azal se meri baiThak yaad hai